Feeds:
Artigos
Comentarios

Archive for the ‘Actividades culturais’ Category

Hoxe pechamos este Festeo tan particular polas circunstancias que vivimos. E que mellor colofón que o Xenerais da Ulla. Recollemos de forma extensa a celebración do Entroido desde ano. Primeiro cos atranques da parroquia de Rarís que tiveron lugar o domingo 9 de febreiro deste ano da man da veciñanza e da Asociación Cultural Pozo da Xerpa, día que ,por certo, choveu moito o que impidiu que o entroido saira pola parroquia, pero non sacou as ganas para poder realizalos igual dentro da Casa Común. E aínda que non foron igual de vistosos sen as vestimentas, as letras dos coros, comparsas e dos atranques feitas polos escritores e escritoras retranqueiros da zona luciron igual de fermosas e fachendosas nun día gris que sen dúbida o encheron de cores.

Continuamos co atranque de Reis baixo o paraugas da veciñanza e da Asociación Cultural O Demo de Reis que aínda que o propio día 15 e 16 de febreiro choveulles trasladárono para o 8 de marzo, día que luciron as súas letras con todo o seu brío e explendor como podemos comprobar no seguinte vídeo:

Rematamos co atranque da parroquia Teo, realizados pola veciñanza e a Asociación de Festexos O Carme de Teo, que tiveron lugar o sábado 22 de febreiro deste ano onde se mostran os Xenerais e Xeneralas engalanados e con voz propia que conforman a espectacularidade desta auténtica expresión do entroido tradicional da Ulla. Con eles pechamos este Festeo, recoñecendo ás asociacións e á veciñanza que manteñen vivo e activo o Concello de Teo. Agradecidos polo seu traballo vémonos no Festeo 2021

Read Full Post »

Este sábado traemos dúas asociacións moi implantadas na realidade do noso Concello en tarefas de igualdade e conciliación. A Asociación Recreativa e Cultural Os Tilos intenta ofrecer dende a súa creación un espazo e un proxecto de encontro coa cidadanía. Destacando sempre, a súa maior aposta, que é ofertar a posibilidade de facer realidade unha Conciliación Familiar, Laboral e Persoal atendendo as necesidades dos diferentes colectivos, dende os máis cativos aos máis grandes cunha enorme capacidade de detectar e adatarse ás necesidades da sociedade.

E continuamos con Teenses pola Igualdade , asociación que tamén leva unha traxectoria dilatada tratando de acadar a participación social e política das mulleres ao obxecto de conseguir unha sociedade cada vez máis alonxada das inxustizas a tarvés de campañas de información e sensibilización que permitan recoñecer os valores positivos da igualdade, implicando especialmente nesta tarefa aos medios de comunicación e a todas as persoas nos aspectos positivos do reparto igualitario das obrigas familiares, profesionais e sociais e na busca dun sentido da igualdade no seu significado máis amplo. Das súas actividades podemos salientao Premio de Poesía María Mariño.

Read Full Post »

Comezamos a recta final do Festeo 2020. E facémolo da man das asociacións do noso Concello dedicadas ó traballo con persoas con diversidade funcional e TEA (trastornos del espectro del autismo). Traemos, en primeiro lugar a BolboreTEA, formado recentemente por nais con fillos e fillas diagnosticados con TEA. Están a traballar para visibilizar os problemas que levan padecendo polo descoñecemento xeral da xente que non acostuma a vivir con persoas diagnosticadas. Arrancaron cunha exposición moi interesante que puidemos desfrutar na BPM do Grilo-Cacheiras acompañada dunha charla dentro do programa Escola de Familias. Grazas por amosar outras realidades

 

E pechamos este venres do Festeo 2020 con Aspamite, asociación de longo camiño no Concello de Teo na mellora das condicións de vida das persoas afectadas por algunha discapacidade. Actualmente atende a 15 persoas no Centro Ocupacional e a 10 persoas no Centro de Día. Podedes ver o seu gran traballo nesta presentación que nos deixaron…

 

 

Read Full Post »

Para rematar o Festeo en liña desta semana contamos cunha cita moi agardada e moi especial como é a dos coros, corais e grupos de canto do noso Concello aos que lle queremos render unha homenaxe publicando a versión íntegra último Cantateo. No pasado decembro participaron neste encontro a  Coral A.C. Cruceiro do Monte, Coral San Simón de Cacheiras, Coro de San Miguel de Raríz, Coral Polifónica da S.R. de San Xoán de Calo e a Coral Polifónica da Mámoa de Luou, e o grupo de canto Aleceia guiados polo gran mestre de cerimonias e veciño de Rarís Esteban Fuentes.

Deixámosvos pois con este vídeo que é un bonito escaparate de talento local, e que recorda un día moi bonito para as corais participantes, pois foi un día cargado de moitas sorpresas e momentos inesquecibles. Agardamos poder vernos pronto de novo presencialmente nos escenarios para seguir desfrutando da festa das voces de Teo.

 

 

 

Read Full Post »

Neste sábado de Festeo 2020 o protagonismo pasa ás Bandas de Música. A Banda De Música Cultural de Teo interpreta para nós en multipantalla a celebrada canción da “Bella e a Bestia”. Nace esta asociación no ano 1989 da man de D. Gervasio Salgueiro Estévez  que forma no solfexo e na técnica instrumental a 19 rapaces de idades comprendidas entre os 10 e os 16 anos, que pasarán a denominarse “Banda de Música Cultural de Teo”, que fan a súa presentación o día 28 de Marzo do 1989 na Praza do Obradoiro.

E a Banda de SR San Xoán de Calo trae a interpretación que fixeron no Auditorio Constante Liste- A Ramallosa sa “Suite Helénica” do Mestre Pedro Iturralde. Desfrutade dun sábado musical coas nosas bandas…

 

 

 

Read Full Post »

No Festeo2020 desta semana, o venres está dedicado ás asociacións que traballan polo patrimonio. Comezamos con Colectivo A Rula , unha asociación co nexo común da súa paixón pola arte rupestre e a súa divulgación e protección no espazo natural que a rodea. O nome provén dun deses espazos máxicos que figuran aínda ocultos, pero que agardemos que en pouco tempo non só os membros do colectivo coñezan. Desfrutade do marabilloso vídeo que fixeron da Ruta dos Petroglifos

A Regionalista é un colectivo de persoas que dende o ano 1992 se ven preocupando polo carácter e a idiosincrasia do noso pobo percorrendo o territorio do noso paíse indo mais aló do que son as fronteiras políticas e xeográficas deste, xa que a cultura non sabe de fronteiras senón de persoas. Deixannos este vídeo a modo de presentación

 

 

Read Full Post »

Para rematar o Festeo en liña desta semana contamos con catro catro titáns de
asociacións do tradicional como son A Ponte Vella de Reis , A Mámoa de Luou , a S.R. de San Xoán de Calo e a Rosalía de Castro de Cacheiras , que nos mostrarán como sempre o seu talento no eido do folclore.

Damos paso xa a Asociación a A Ponte Vella de Reis que nos trae nesta ocasión unha  achega explicativa sobre o espectáculo de raíz “Galicia, terra de LENDA”. Esta actuación emerxe dun equilibrio entre o teatro, baile e música tradicionais, e nel cobra vida un seleccionado repertorio de lendas, crenzas e costumes da nosa terra. Neste vídeo podemos ver  unha reportaxe moi coidada e traballada sobre este proxecto tan interesante:

Continuamos coa A Mámoa de Luou da man do grupo de gaitas Suasebe dirixido por Edelmiro Fernández que nos traen  unha peza de autor: A Xota muxicas do gaiteiro xa falecido Nazario González tamén coñecido como Moxenas. Unha preciosa actuación  musical que foi gravada no confinamento  e que hoxe poderemos desfrutar aquí:

Dende a S.R. de San Xoán de Calo envíannos unha bonita representación da Muiñeira de Merexo interpretada polo grupo de baile Adail. Que non pare o baile nun día de festa como hoxe!

Poñemos o broche final deste domingo de Festeo coa actuación de Rosalía de Castro de Cacheiras que nos trae do seu grupo titular de baile a Jota de Lira, un Tango da Illa de Ons, a Moliñeira e Jota dos Ancares e a Muiñeira e maneo de Cabaleiros, catro pezas de baile que nos dan a despedida do Festeo deste fin de semana ata o vindeiro venres.

Read Full Post »

Abrimos o segundo día do Festeo coa asociación máis festivaleira a Asociación Cultural Lúa Chea e a máis revindicativa de todo Teo a  Plataforma Casalonga limpa de Resíduos.

A Asociación Lúa Chea organizadora do coñecido festival Música na Noite, que se celebra  cada primeiro fin de semana de xullo no campo de San Domingo na parroquia teense de Calo. Pero ademáis deste festival esta asociación organiza moitas actividades que son menos coñecidas pero igual de interesantes, entre unha delas están as andainas que fan polo roteiro da Batalla de Cacheiras das cales nos mandan un resumo neste vídeo:

A Plataforma Casalonga limpa de Resíduos é a siguiente protagonista deste día, unha entidade que leva dende o 2018 loitando de xeito forte e contundente en contra da pretendida implantación do proxecto da planta de reciclaxe da empresa Toysal na canteira da Casalonga. As actividades que levan feito son moi numerosas e  plásmanse nunha ampla axenda en forma de manifestacións, recollida de sinaturas,  pancartas,  campañas como a de “véndese”,  stands,  de berros polas estradas e polas rúas con cadeas humanas e andainas, das súas representativas camisetas, de debates electoriais, de centos de reunións, alegacións,  festivais,  concertos,  videoclips, etc ao ritmo das guitarras e de pateadas que se reflicten neste vídeo  que nos envían aquí cunha canción que teñen a modo de himno da plataforma Únete. Esta canción foi  creada polo grupo musical da Casalonga Deseqilibrio Mental . Vamos alá a escoitala e a ver o vídeo onde nos explican parte das cousas que fan:

Read Full Post »

Día 9. Traemos un autor moi especial. Bonifacio Suárez que desenvolveu parte da súa vida laboral en Calo. Como mestre exerceu na escola da Rúa de Francos entre 1931 e 1942 e como empregado do ferrocarril foi xefe de estación de Osebe.Tamén foi poeta escribindo poesías íntimas e otras para pechar actos sociais, como os “brindos” que lles dedica a amigos seus ante algún acto para homenaxealos.Tamén realizou letras de cancións para o coro-orfeón da agrupación Cantigas e Agarimos de Santiago de Compostela, cantares para as comparsas de Entroido de Calo e para os grupos que no Nadal percorrían a parroquia cantando a panxoliña. No noso fondo local contamos co volume no que David Otero Fernandez, a iniciativa do seu neto Xosé Ramón Quintáns Suárez, e publicado pola Fundación Amigos De Galicia, recompilou parte da súa poesía. Na ficha, queremos salientar a fotografía na Escola da Rúa de Francos (ca. de 1933) de Bonifacio Súárez e o seu alumnado, que foi coloreada polo encargado do Arquivo Municipal Pablen Compostela Teo cuns resultados espectaculares

Bonifacio Suárez na Festa Dixital das Letras Teenses

Hoxe sábado chegan á Festa dixital das letras teenses, as letras máis revindicativas de todo o Concello de Teo nos últimos anos da man da Plataforma Casalonga Limpa de Residuos As súas letras plásmanse nunha ampla axenda en forma de manifestacións, recollida de sinaturas, pancartas, campañas como a de “véndese”, stands, de berros polas estradas e polas rúas con cadeas humanas e andainas, das súas representativas camisetas, de debates electoriais, de centos de reunións, alegacións, festivais, concertos, videoclips, etc ao ritmo das guitarras e de pateadas, que son sen dúbida as letras que con máis forza se sinten no noso Concello e nas que máis xente participa. As letras dunha veciñanza que loita forte e contundente por unha terra mellor, a través dun cambio de letra, para divulgar e concenciar ás persoas afectadas (dende Compostela á ría de Arousa) pola pretendida implantación do proxecto da planta de reciclaxe da empresa Toysal na canteira da Casalonga.

Presentamos aquí este vídeo que nos envían, onde agradecen a colaboración das Asociacións Teenses que sempre están ó seu carón, e onde participa o alumnado da Escola Unitaria da Casalonga do Cra de Teo esa canteira de veciños e veciñas máis pequenos que cos seus debuxos dan ideas para un futuro mellor e para a unha Casalonga limpa de residuos. Que as súas letras claras e firmes se espallen por todos os recunchos do Concello e da comarca para abrirnos os ollos para loitar por un concello e unha terra con porvir.

Read Full Post »

Día 8. Hoxe traemos un xornalista, profesor universitario autor de libros de ensaio, viaxes, novela e director de máis de oitenta documentais e serie de TV, Valentín Carrera. Contamos cun importante fondo nas Bibliotecas Municipais de Teo, pois fixo unha doazón na BM do Grilo-Cacheiras de diversos materiais. Recuperamos dentro da súa ampla bibliografía Riosil, premio Blanco Amor 1990 onde narra como en embarcou no porto de Marín cos mariñeiros galegos do buque As cara ao Gran Sol e no inverno seguinte participou como cronista na Primeira Expedición Española á Antártida. Escrita «á maneira de Truman Capote», despois de ler A sangre fría, como entón lle suxeriu o editor Víctor Freixanes, esta novela é o relato veraz e crú daquelas experiencias mariñeiras. A versión en castelán conserva o título orixinal do autor, La puta mar.

Valentín Carrera na Festa Dixital das Letras Teenses

Na Festa das letras dixitais teenses a proposta chega dende o Arquivo Municipal, da man do seu responsable Pablen Compostela Teo que invita a que coñezamos un dos alcades históricos do noso Concello.
“José Sánchez Villamarín foi un polifacético persoeiro que revolucionou a sociedade galega decimonónica. Enxeñeiro agrónomo, avogado, activista republicano, escritor, empresario, editor, foron só algunhas das súas facetas vitais. Na súa traxectoria política destacou por presidir a corporación teense (1854 – 1855) e a Compostelá (foi alcalde durante a Primeira República). Xunto con Martiño Noriega, son os únicos que tiveron a honra de exercer como rexedores en ambos concellos.
De ideoloxía liberal e republicana foi un dos representantes máis sobranceiros do federalismo rexionalista, presidente do Comité Democrático Progresista de Santiago de Compostela, que mesmo chegou a presentar unha proposta para un Estatuto de Galicia que non tivo éxito. Ocupou tamén un papel importante no seo da Real Sociedade Económica de Amigos do País de Santiago de Compostela, ocupando o posto de Vicepresidente da entidade. Destacou polo seu activismo en diferentes proxectos, sendo o principal impulsor da primeira liña ferroviaria de Galicia, Conxo – Carril, para unir “Arousa e Compostela”. A súa vinculación con “esta liña central de Galicia” continuou como membro do consello de administración da compañía do “Ferro-Carril Compostelano de la Infanta Doña Isabel”. Nas súas verbas o ferrocarril compostelano “ten que producir o efecto de converterse no eixo da contratación e da vida mercantil de tan populosa e importante comarca”, sen “ter que depender da relación desa sogra madrasta da Coruña” (Gaceta de Galicia, 27/03/1888).
No concello teense inicia a súa vida política a mediados do s. XIX e tamén salienta como importante propietario e industrial, foi o dono dun gran curtidoiro que estivo situado nas Galanas.
Porén, alcanzou grande popularidade pola súa faceta “ocultista”, converténdose nun dos líderes do Grupo Espiritista de Santiago. Un feito que lle ocasionaría numerosas críticas de persoeiros e colectivos sociais e culturais da época, que o criticaban polo seu suposto sectarismo e alcumaban como o “abogado chiflado” (Menéndez Pelayo). Lonxe de preocuparlle, defendeu ata o seu pasamento o espiritismo de cariz cristiá.
Como editor e baixo o pseudónimo de Niram-Alliv (Villamarín ó revés) publica a obra “Aldrete, o los espiritistas españoles del siglo XVII”, un pequeno libro que recuperaba o traballo dun dos precursores do espiritismo penínsular, o médico Luis de Aldrete, cuxos libros foron prohibidos pola Inquisición. O libro de Villamarín tamén sufriu o rexeitamento da “curia” compostelá mais provocou o efecto contrario ó pretendido polo cabido e non tardaron en aparecer novas edicións deste curioso libro que podedes descargar na súa versión dixital dende a Biblioteca Nacional:
http://iapsop.com/…/1877__niram-alliv___aldrete_o_espiritis…
J.S.V. faleceu en 1892, sendo soterrado no cemiterio da Confraría da Nosa Señora do Rosario do Convento de San Domingos de Bonaval, da cal era confrade.

Cadro de José Sánchez Villamarín, Vicepresidente da Real Sociedade Económica de Amigos do País. Autor: José María Fernández (JMF). Finais do s. XIX. Fondos da RSEAP

Acta plenaria do concello de Teo do 8 de xaneiro de 1857 presidida polo licenciado José Sánchez Villamarín. Sig. AMT. 1.6

Read Full Post »

Older Posts »

Bibliotecas Municipais da Coruña

Benvido ao blog das nosas bibliotecas

A Grileira

Blog das Bibliotecas Municipais de Teo

WordPress.com

WordPress.com is the best place for your personal blog or business site.